Почитувањето на авторските и сродните права е топ-приоритет на СРД

Обврска на СРД да се грижи за авторските права

Советот за радиодифузија како регулаторно тело во сферата на електронските медиуми има законска обврска да ја регулира „медиумската содржина“, да се грижи за разновидноста на медиумската понуда, да ја заштитува малолетната публика од медиумски содржини, коишто можат штетно да влијаат врз неа и слично. Секако една од најзначајните обврски е и заштитата на авторските и сродните права и на оние медиумски сервиси од странски земји, што се реемитуваат преку операторите на јавните комуникациски мрежи, како што се операторите на кабелска телевизија, IPTV, дигитална безжична телевизија, сателитска телевизија како DTH (Direct-to-Home) итн.

Како изгледа регулацијата на аудио-визуелните содржини кај операторите на јавните комуникациски мрежи?

Согласно Законот за радиодифузната дејност, СРД им ги регистрира таканаречените „програмски пакети“, коишто се збир на програмски сервиси (телевизиски и радиски), на операторите на јавните комуникациски мрежи. Оваа регистрација на пакети се врши врз претходно издадена потврда за уредени авторски права за одреден телевизиски или радио канал од страна на Министерството за култура. За секоја промена на пакетот – додавање или одземање на канал – операторот мора да го информира СРД, кој потоа соодветно регистрира програмски пакет.

(Фото: Вработен во СРД врши мониторинг на различни оператори на јавни комуникациски мрежи: кабел, сателит, дигитална земска ТВ)

Заради поефиксана регулација на авторските и сродните права и борба против пиратеријата СРД формираше посебен Сектор во рамките на Стручната служба на СРД, чијашто надлежност исклучиво е регистрација на програмски пакети и заштита на авторските и сродните права во радиоидфузната сфера во Македонија. Овој сектор врши редовен мониторинг на содржините што се емитуваат од македонските електронски медиуми и оние што се реемитуваат низ мрежите на операторите, а потекнуваат од странство. Главниот мониторинг на она што го реемитуваат операторите се врши во централниот мониторинг и процесинг центар на СРД во Скопје, а мобилни екипи вршат постојан мониторинг и во руралните подрачја.

Казни за прекршителите на авторските и сродните права

По спроведениот мониторинг резултатите се споредуваат со регистрираните пакети во СРД, односно со оние програмски содржини за кои одреден оператор има обезбедено авторски права. Доколку во содржините што се реемитуваат се забележат канали за кои не се уредени авторските права, тогаш СРД поведува прекршочни или кривични постапки против овие субјекти.

Зошто не можат да се гледаат ХТВ2, Нова, РТЛ-Хрватска во Македонија?

Значи, за реемитување на секој канал – домашен или странски – истиот канал мора претходно да се согласи за негово реемитување на територијата на Македонија. Некои канали, како што се ХТВ2, Нова, РТЛ-Хрватска, Премиере итн. немаат интерес за нивно реемитување во Македонија. Затоа овие канали не им даваат согласност на операторите на јавни комуникациски мрежи да ги реемитуваат на територијата на Македонија и бараат македонските власти да го спречат и казнат нивното реемитување. Па затоа, секое нивно вклучување во програмските пакети е казниво дело и СРД мора да постапува согласно законските одредби за заштита на авторските права.

СРД на увид на граѓаните на својата веб страница во делот „Оператори“ ги стави регистрираните програмски пакети за да знаат кои програмски сервиси легално ги пренесува нивниот кабелски, IPTV, DVB-T или DVB-S оператор.

СРД заштитата на авторските и сродните права ја врши исто така во соработка и во координација со Министерството за внатрешни работи, Заводот за индустриска сопственост, Јавното обвинителство, Агенцијата за електронските комуникации и други институции во земјава.

Автор: Борче Маневски

Актуелно

ШТО Е ДИГИТАЛИЗАЦИЈА НА ТЕЛЕВИЗИЈАТА?

Дигитализацијата на телевизијата подразбира производство, пренос и прием на телевизиски програми во дигитален облик, со користење на дигитални методи на модулација и обработка на сигналот.

Актуелно

Вработување